प्रधानमन्त्री केपी शर्मा ओलीले आउँदो आइतवार विश्वासको मत लिने

प्रधानमन्त्री केपी शर्मा ओलीले आउँदो आइतवार विश्वासको मत लिनु हुने भएको छ । प्रधानमन्त्री ओलीले साउन ६ गते आइतवार विश्वासकाे मत लिन लाग्नुभएको नेकपा एमालेका मुख्य सचेतक महेश बर्तौलाले जानकारी दिनुभयो ।

आइतवार नै प्रधानमन्त्री ओलीले देशवासीका नाममा सम्बोधनसमेत गर्नुहुने छ । त्यसपछि उहाँले विश्वासको मत लिनुहुने छ । कांग्रेस र एमालेले असार १७ गते सहमति गर्दै गठबन्धन गरेर नयाँ सरकार बनाउने सहमति गरेका थिए ।

सहमतिअनुसार ओली असार ३० गते प्रधानमन्त्री नियुक्त हुनुभएको हो । प्रधानमन्त्री नियुक्त भएसँगै ३० दिनभित्र विश्वासको मत लिनुपर्ने संवैधानिक व्यवस्था छ । त्यही व्यवस्थाअनुसार ओलीले आइतवार प्रतिनिधि सभाबाट विश्वासको मत लिन लाग्नुभएको हो ।