नेपाल स्काउट शुद्धिकरण अभियान चौथो दिनमा, माग सम्बोधन नभएको भन्दै आन्दोलनरत पक्ष आक्रोशित

काठमाडौँ । नेपाल स्काउटको केन्द्रमा शुद्धिकरणको माग राख्दै सुरु गरिएको आन्दोलन चौथो दिनसम्म जारी रहेको छ। आन्दोलनरत पक्षले आफ्ना मागहरू अझै सम्बोधन नभएको बताउँदै संघर्षलाई थप सशक्त बनाउने चेतावनी दिएको छ। आन्दोलनको क्रममा एक घण्टे रिले अनशन शान्तिपूर्ण रूपमा सम्पन्न भएको छ। अनशनरत सञ्जय खड्गीले यदि मागहरू पूरा नभए थप कडा आन्दोलन गर्न बाध्य हुने बताएका छन्। नेपाल स्काउटका वरिष्ठ स्काउटर तथा राष्ट्रिय प्रशिक्षक गोपालकृष्ण ताम्राकारले आन्दोलनरत पक्षले अघि सारेका चार बुंदे मागहरू जायज रहेको उल्लेख गर्दै सुधार आवश्यक रहेको बताएका छन्।

नेपाल स्काउट प्रगतिशील संघर्ष समितिका संयोजक पुण्यराम गोथेले हालका पदाधिकारीहरू मुद्दाबाट डराएको आरोप लगाउँदै, ूयो शुद्धिकरण अभियान रोकिने छैन,ू भन्ने दृढता व्यक्त गरे। संघर्ष समितिका सदस्य सञ्जय महर्जनले नेपाल स्काउटमा देखिएका अनियमितताहरूविरुद्ध आफू सधैं संघर्षरत रहने प्रतिबद्धता जनाए। आन्दोलनका प्रवक्ता आशिक कार्कीले अग्रजहरूको उपस्थितिले आन्दोलनलाई थप ऊर्जा मिलेको बताए। अभियन्ता विदुर गिरीले एक टिभिसँग भएको अन्तर्वार्ताका केही अंशहरू पुनः प्रसारण गर्दा लुकाइएको भन्दै गम्भीर आपत्ति जनाए। यसै क्रममा, गिरिले खेलकुद मन्त्रालयको ध्यानाकर्षण गराउँदै नेपाल स्काउट शुद्धिकरण अभियानले अघि सारेका चार सूत्रीय माग तत्काल सम्बोधन गर्न र छानबिन समिति गठन गर्न माग गरे। उनले भने, “नेपाल स्काउटलाई निजी स्वार्थका लागि बन्धक बनाउनेहरूको पर्दाफास गर्नुपर्छ।’’