रिठ्ठाबोटे विद्यालय व्यवस्थापन समितिको अध्यक्षमा सुमन लो. तामाङ चयन

काठमाडौं । धादिङको गजुरी गाउँपालिका वडा नम्बर ८ स्थित रिठ्ठाबोटे आधारभूत विद्यालयमा सम्पन्न भएको छात्रवृत्ति वितरण र शैक्षिक सामग्री वितरण कार्यक्रममा विद्यालय व्यवस्थापन समितिको नयाँ अध्यक्षको रूपमा सुमन लो. तामाङ चयन भएका छन्। कार्यक्रममा विपन्न, जेहेन्दार, र दुर्गम क्षेत्रका विद्यार्थीहरूलाई छात्रवृत्ति र शैक्षिक सामग्री वितरण गरिएको हो। नवगठित समितिको उद्देश्य विद्यालयको शैक्षिक गुणस्तर सुधार र भौतिक पूर्वाधारको विकासमा सक्रिय भूमिका निर्वाह गर्नु रहेको छ।

कार्यक्रममा प्रमुख अतिथि गजुरी गाउँपालिका अध्यक्ष गणेशलाल श्रेष्ठ र विशेष अतिथि वडा नं. ८ का अध्यक्ष देवराज ओझा रहेका थिए। साथै, शिक्षक, अभिभावक, विद्यार्थी, र स्थानीय समुदायको उत्साहजनक सहभागिता रहेको थियो। गजुरी गाउँपालिका अध्यक्ष गणेशलाल श्रेष्ठले शिक्षा क्षेत्रमा निरन्तर सहयोग गर्ने प्रतिबद्धता व्यक्त गर्दै विद्यालयको समग्र विकासमा गाउँपालिकाको सहयोग जारी रहने कुरा बताए। वडा अध्यक्ष देवराज ओझाले विद्यालयको समग्र सुधारका लागि व्यवस्थापन समितिको चयन गरिएको बताएका छन्।

नवगठित समितिले विद्यालयको गुणस्तरीय शिक्षा र दीर्घकालीन विकासका लागि योजना अघि बढाउने प्रतिबद्धता जनाएको छ। यस अवसरमा, सुमन लो. तामाङले विद्यालयमा शैक्षिक सामग्री वितरण गर्दै विद्यार्थीहरूको उज्जवल भविष्यको कामना गरे। विद्यालय प्रधानाध्यापक सुन बहादुर स्याङ्तङले कार्यक्रमको सफलता र सहभागिता प्रति खुशी व्यक्त गरेका छन्।