काठमाडौंको भृकुटीमण्डपमा चैत २८ गतेदेखि ‘ दोश्रो नेशनल होर्टिकल्चर एक्स्पो २०८१ ’ हुने

निराज रानाभाट, काठमाडौं । ग्राहकहरुले खोजेका कुरा सजिलै एकै छाना मुनी पाउने र व्यवसायीहरुले आफूले उत्पादन गरेका फलफूललाई बिक्री गर्ने उद्देश्यले काठमाडौंको भृकुटीमण्डपमा नर्सरी व्यवसायी संघको आयोजनामा ‘ दोश्रो नेशनल होर्टिकल्चर एक्स्पो – २०८१ ’ चैत २८ गतेदेखि ३१ गतेसम्म हुने भएको छ । ‘ नर्सरी व्यवसायको विकास र विस्तार, स्वच्छ वातावरण सहित आय र रोजगार ’ भन्ने नारा सहित हुने एक्स्पोमा यस वर्ष धेरै भन्दा धेरै नर्सरी व्यवसायीहरु समेटेर भव्य बनाउने तयारी भइरहेको संघले बताएको छ । एक्स्पोमा देशभरिबाट पुष्प नर्सरी, फलफूल नर्सरी, कृषि वन नर्सरी तथा जडीबुटी नर्सरीका विभिन्न प्रजातिका बोटबिरुवाहरू प्रदर्शनी तथा बिक्री / वितरणको लागि राखिने छ ।

यस्तै, उक्त एक्स्पोमा नर्सरी व्यवसाय गर्न आवश्यक ग्रिन हाउस प्रविधि, मलखाद, अर्गानिक एवं रासायनिक विषादी, बिउ विजन, प्लास्टिक मेटेरियल, औजार उपकरण तथा प्रविधिहरूको समेत स्टल रहने संघले जनाएको छ । पुष्पप्रेमी, फलफूलप्रेमी, जडिबुटीप्रेमी, बनजन्य हरियाली गार्डेन प्रेमीलाई लक्षित गरी एक्स्पो आयोजना गरिन लागेको नर्सरी व्यवसायी संघका अध्यक्ष रामजी प्रसाद तिमिल्सिनाले बताए । तिमिल्सिनाले भने,‘एक्स्पोमा विभिन्न प्रजातिका फूल फल्ने तथा नफल्ने आलंकारीक फल विरुवाहरुलगायत कृषि तथा वन, जडिबुटी नर्सरी, फलफल नर्सरीबाट उत्पादित विविध प्रजातिका बोटविरुवाहरु प्रदर्शनी तथा बिक्री वितरणको लागि राखिने छन् ।’ नर्सरी व्यवसाय गर्न चाहने नव उद्यमी, जिज्ञासु एवं अध्ययन अध्यापन साथै अनुसन्धान गर्ने सम्पूर्णको लागि यस एक्स्पो बृहत साझा मञ्च हुने संघले जनाएको छ ।