चीनका राजदूतद्वारा भौतिक पूर्वाधार मन्त्रीसँग भेट स्याफ्रुबेसी–रसुवागढी सडक तथा सिमा पुल पुननिर्माणबारे छलफल

काठमाडौ। नेपालका लागि चीनका राजदूत चेन सङले भौतिक पूर्वाधार तथा यातायात मन्त्री देवेन्द्र दाहालसँग शिष्टाचार भेट गर्नु भएको छ । बिहिबार मन्त्रालयमा भएको भेटमा बाढीले क्षतिग्रस्त बनाएको स्याफ्रुबेसी–रसुवागढी सडक तथा सिमा पुल निर्माण लगायतका विषयमा छलफल भएको हो । भेटका क्रममा क्षतिग्रस्त सडक तथा पुलको पुननिर्माणमा चिनिया पक्षले चासो देखाएको छ । सिमापुल भएको स्थान जतिसक्दो छिटो अस्थाई पुल बनाउन चिनिया पक्षबाट प्रतिवद्धता आएको छ । यसैगरि चिनिया सहयोगमा सञ्चालित अन्य आयोजनाहरु टोखा–छहरे सुरुङ्मार्ग, हिल्सा–सिमिकोट सडक, खाँदबारी–किमाथांका सडक लगायतका विषयमा पनि छलफल भएको थियो । छलफलमा राजदूत चेनले काठमाडौ–चक्रपथ दोश्रो खण्ड विस्ताको काम छिटै शुरु हुने बताउनु भयो ।

भेट पछि मन्त्री दाहालले नेपालको विकासमा चीनले गर्दै आएको सहयोग प्रति धन्यवाद व्यक्त गर्नुभयो । आगामी दिनमा नेपाल र चीन विच रहँदै आएको सहकार्य अझ प्रगाढ बन्ने विश्वास समेत व्यक्त गर्नुभयो । छलफलमा सहभागी मन्त्रालयका सचिव केशवकुमार शर्माले बाढी क्षतिग्रस्त बनाएको सिमापुल रहेको स्थानमा दशैं अघिनै पुल निर्माण हुने अपेक्षा राखिएको छ । मन्त्री दाहाल, मन्त्रालय एवम् सडक विभागका अधिकारीहरुको विच फलदायी छलफल भएको सचिव शर्माले जानकारी दिनुभयो ।
बाढीले नेपाल–चीनको मुख्य नाका रसुवागढीबाट आवात जावतमा कठिनाई भए पछि मन्त्री दाहालले त्यस खण्डलाई सुचारु गर्ने विषयमा चासो लिँदै आउनु भएको छ । छलफलमा सडक विभागका महानिर्देशक डा. बिजयकुमार जैसी लगायत मन्त्रालय तथा सडक विभागका अधिकारीहरु सहभागी हुनुहुन्थ्यो ।