सुम्निमाको ‘झरी’ मा विषाद,रोमान्स र आशा

काठमाडौंँ, गायिका एवं मोडल सुम्निमाले खुसी र उदासी दुवैखाले रङ र स्वादको सम्मिश्रण रहेको पप–रक शैलीको म्युजिक भिडिओ ‘झरी’ सार्वजनिक गर्नुभएको छ । क.तमोटका सुन्दर शब्दलाई भावपूर्ण सङ्गीत र अभिनयद्वारा सिँगारिएको भिडियोमा मूल रूपमा विषाद, रोमान्स र आशा जस्ता मनोदशा देखाइएको छ ।

सो साङ्गीतिक श्रव्यदृश्य सामग्रीमा एक जोडी युवकयुवती एकार्कालाई साँचो माया गर्छ । उमेर उस्तै भए पनि भावनात्मक रूपमा युवक पाको, स्थिर र गहिरो छ भने युवती अलि आलोकाँचो । केटो मायाको अर्थ आफैँलाई असल बनाउनु हो भनेर सम्झाउँछ तर त्यसलाई केटीले आत्मसात् गर्न नसक्दा ’ब्रेकअप’ हुन्छ । उनलाई पछि मात्र महसुस हुन्छ— माया कुनै परीकथा होइन, पप्पी–लभ पनि होइन बरु यसमा इमानदारी जरुरी हुन्छ ।
साउने झरीमा पाँच–छ घन्टा रुझेर भिडिओ बनाइएको सुम्निमाले बताउनुभयो । “ घरभित्र बसी झ्यालबाहिर यसो हात निकालेर मात्र झरीको मर्म बुझाउन सकिँदैन”, उहाँले भन्नुभयो, “यस म्युजिक भिडियोमा मैले वर्षामा सर्वाङ्ग भिजेर, मेकअप बिर्सेर कलात्मक प्रस्तुति दिने कोसिस गरेकी छ ।” बर्सेको पानीमा ‘एङ्गल’ र ‘लाइट’ मिलाउन भने मुस्किल परेको उहाँको अनुभव छ ।