पत्रकार जमकटेललाई पितृशोक

१४ असार : नुवाकोट काठमाडौँ पत्रकार समाजका संयोजक रमेश जमकटेललाई पितृशोक परेको छ । नुवाकोट, बेलकोटगढी–१०, बेलकोट निवासी उहाँका पिता गोविन्दप्रसादको गएराति ५६ वर्षका उमेरमा त्रिवि शिक्षण अस्पताल, महाराजगञ्जमा निधन भएको पारिवारिक स्रोतले जनाएको छ । उहाँ पित्तथैलीको अर्बुदरोगबाट ग्रस्त हुनुहुन्थ्यो ।

विसं २०७४ को स्थानीय तह निर्वाचनमा नेपाली कांग्रेसबाट वडाध्यक्ष उम्मेदवार हुनुभएका उहाँ स्थानीय लोकगीत–सङ्गीत संरक्षणमा पनि क्रियाशील हुनुहुन्थ्यो । स्व जमकटेलका ‘लोकपथ डटकम’ का अध्यक्ष तथा सम्पादक रमेशसहित तीन छोरा, एक छोरी र श्रीमती हुनुहुन्छ । उहाँको गएराति नै पशुपति आर्यघाटमा दाहसंस्कार भइसकेको छ ।